د البيروني پوهنتون استادانو ته د مصنوعي ځیرکتیا د ګټې اخیستنې په اړه روزنیز ورکشاپ ترسره شو.
د البيروني پوهنتون د استادانو مسلکي پراختیا مرکز آمریت له لوري د دغه پوهنتون د استادانو او اداري کارکوونکو لپاره د 《له مصنوعي ځیرکتیا څخه د ګټې اخیستنې لارښود》 تر سرلیک لاندې یو ورځنی آنلاین ورکشاپ د معلوماتي ټکنالوژۍ آمریت په تالار کې ترسره شو.
په دې روزنیز ورکشاپ کې د پوهنتون درنې رهبرۍ، استادانو او کارکوونکو ګډون کړی و. د پروګرام په پیل کې د البيروني پوهنتون عمومي رئیس ښاغلي مفتي وقایت الله وقار حنفي، د مصنوعي ځیرکتیا پر اهمیت او معاصر علمي او مسلکي پرمختګونو کې د هغې پر رول هر اړخیزې څرګندونې وکړې. نوموړي ټینګار وکړ، چې د مصنوعي ځیرکتیا سالمه او هدفمنده کارونه کولی شي د تدریس، څېړنې او اداري چارو په پرمختګ کې نوې لارې پرانیزي.
ورپسې د ژورنالیزم پوهنځي استاد ښاغلي پوهندوی احمد جاهد مشتاق، چې دا مهال په چین کې د دکتورا برنامې محصل دی؛ په آنلاین بڼه د ورکشاپ اصلي برخه وړاندې کړه. نوموړي ګډونوالو ته د مصنوعي ځیرکتیا د اغېزو، ګټو او عملي استفادې په اړه مفصل معلومات ورکړل.
په پای کې د پوهنتون د علمي چارو مرستیال ښاغلي پوهنوال دکتور مولوي عبدالحق حنیف له ښاغلي مشتاق څخه مننه وکړه او د ورکشاپ د لاسته راوړنو ستاینه یې وکړه. نوموړي دغه روزنیز ورکشاپ د دعا په لوستلو سره پای ته ورساوه.
